Semana Santa de antes y de ahora.

ARAPOKÕINDY MARANGATU YMA HA KO’ÁĞAYGUA

Árapokõindy Marangatúpe niko ojeromandu’a Ñandejára Ra’y ñemano, mayma cristiano-va guive ou itávape. Arapokõindy Marangatu aja pukukue yma ndaipórimi oñe’ẽ ñemi, oñe’ẽ ayvu térã ihu’úva, mitã oñaníva térã oñembosaráiva, ndaipóri ñeinupã, ñeikytĩ, ñembota, he’ímiva’erã jaryikuéra jajapóramo upéva jajapohína Ñandejára Ra’ýre. Yma niko ojehopa tupãóme arateĩ guive, kuñakarai, taha’e ğuaiğui, kuñataĩ, mitãkuña’i oñemondeva’erã sái pukúpe, isapatu ñembotypa, ijaojyvapukuva’erã, ha iñakãre ojaho’íva, katuete Rosario ha misal. Oñepyrũvo arapokõindy Marangatu, arateĩme oiko Pindo ñemongarai. Upéi pe ararundy rupi oikóma chipa apo, arapópe ojejapo karuguasu ojeromandu’a hağua karuguasu pyhare (Ultima Cena), ha upe ára guive ndojejapovéima mba’evéichagua tembi’u.

Arapoteĩ ka’aru ojehopa jey tupãóme, oñehendu hağua Ñandejára Pokõiha Ñe’ẽ (Las Siete Palabras). Pe árape noĩvéima ñembo’eguasu (misa) ha ndoje’uvéima so’o. Ára pokõime katu oğuahẽmbotápe pyhare pyte ojeje’oipa jey tupãóme, oñehendu hağua ñembo’eguasu (misa). Ko’ẽ mboyve katu oiko Tupãsy ñuğuaitĩ, péva rupive ñanemandu’a jey hağua Ñandejára oikove jeýha. Arateĩme oiko ñembo’eguasu (misa) Pascua de Resurrección rehegua ha upéi opavave mitã ohova’erã Paíno ha Maína (padrino y madrina) rógape oñetupãnói ha katuete opascuamanteva’erã chupe hikuái ipo’a hağua. Ambue árape ojeho jey vove mbo’ehaópe maymáva ojapo ¡Pascua! Ha oñomuña mbo’ehao korapýre.

Ko’áğa katu ndaha’evéima ymaguaréicha.

Arapokõindy oñepyrũ upe arateĩme (domingo) pindo ñemongarai ndive ha arapo (jueves) oñepyrũ ojegueromandu’a. Opa tembiapo, oiko chipa apo opaite ogaháre, oĩ ohóva hóga okaraha rupi, ohechávo ipehẽnguekuérape, tupãokuérape ojejapo avei oĩ Las Siete Palabras ha Estacionero-kuéra opurahéi asy gueteri, ndahetavéima, áğakatu oĩ. Ára poteĩme (domingo) oiko ñembo’eguasu Pascua de Resurrección rehegua, upéi oĩntema ojapóva tupãnói Maína ha   Paíno-pe, ambue katu oha’arõ jopói huevo de pascua ha ambuéichagua mba’e, avei ikatu ja’e ko’áğa rupi ndaipóriveiha kirirĩ, maymáva nunga ijayvu, oĩ ta’angambyry, puhoe ayvu ha ñembosarái.