viernes, 6 de abril de 2012

PLAZA MARCELINA INSFRÁN - San Lorenzo.


PLAZA MARCELINA INSFRÁN
Marcelina Insfrán, ha’éva’ekue kuñakarai San Lorenzo-ygua, hóga oĩ ko’áğa meve, tape hérava Cerro Cora ha Mariscal López-pe. Ha’e kuñakarai imba’apo rayhúva, oñeha’ã ára ha ára osẽvo tenonde, péichape ojogua ohóvo yvy, ha upéi ijyvy hetáma rire oiko chugui yvyjára. Peteĩ korapy ndetuichapa jepéva, oĩva hóga renondetépe, ha ipype oĩ yvyra Paraíso rehegua ndetuicháva, 1 m diametro iñanambusu. Upe korapy ojepyso 1 hectárea, piro’ýgui ha kuarahy’ãgui henyhẽ, ohecharamoite upéva ha ojerure ani hağua araka’eve upéva ojeity upe tendágui. Upérõ upépe oñemohenda ñemuhãguasu, ha omano mboyve ome’ẽrei Municipalidad-pe ojejapo hağua chugui plaza, opa tembiapo tavayguakuéra ojaposévape ğuarã. Heta ary ohasa rire ogayguakuéra oñemoirũ hikuái ani hağua ojehepyme’ẽ upe yvy. Oñemboja’ose yvy ojeiko hağua ipype. Oğuahẽ Revolución ára ha tapichakuéra oiko aja mba’evai oikéma katu oñemohenda upépe.
Opavave oñomoirũ hikuái ha yvýre oñemombarete, péicha ko’áğa peve ojeguereko tenda pytu’urã, jeguata, manga ñembosaráirã ha mba’e, ha ogueraháva Ña Marcelina réra, oñembyatyhápe avakuéra ka’arukue oterere’u hağua ary pukukue. Oğuahẽvo 10 jasypoapy, upépe oñemohenda calesita ha opáichagua ñembosarái, San Lorenzo ára oñemomorãvo.
Táva San Lorenzo-pe yma guive y oñemboy’úva oñeguenohẽ Ykua Pa’i oĩva Barcequillo-pe, Ykua Cañón oĩva Yverápe, ha Ykua Laurel oĩva tenda ko’áğa hérava Villa Universitaria-gui. Y potĩ sakã ha ho’ysã asýva. Ysyry San Lorenzo, upérõ ipotĩ, ojejahu ha oje’aojohéi ha mba’e ipype.
Matilde Galeano.

No hay comentarios:

Publicar un comentario