Biografia de Pedro Gomez Serrato

PEDRO DARÍO GÓMEZ SERRATO.

Heñói 18 jasyteĩ 1900 Santísima Trinidad, Paraguaýpe, itúva Florencio Gómez ha isy Ángela Serrato. Oho mbo’ehaópe ha oğuahẽ 3º curso peve, Colegio Jorge López Moreira, Paraguaýpe, avei oñemoarandu pumbasyháraramo Banda de Policía-pe, imbo’eharakuéra Nicolini Pellegrini ha Salvador Déntise, Italia-ygua.

Upéi oho Bahía Negra Banda de Música sambyhyháramo, Chaco Ñorãirõme oho R.I. General Díaz-pe, upéi oho jey Bahía Negra-pe ha ary 1947-pe oikórõ guare Revolución, ombohovakére Tendota Higinio Morínigo-pe oho opyta ka’irãime Peña Hermosa-pe, upépe oĩ aja oñemoangirũ kuatia ñe’ẽ rupive Rubén Darío Céspedes, Pedro Encina Ramos, José Domingo Portillo, Deidamia González ha ambuéva ñe’ẽpapára katupyrykuéra ndive.

Oje’e Darío Gómez Serrato ohupytyhague upe tenda ijyvatevéva ñe’ẽporãhaipyre guaraníme Manuel Ortíz Guerrero ha Narciso R. Colmán-icha ou ko yvy ape ári omyanyhẽ hağua pa’ũ inandíva ñoha’anga guarani.

Cirilo R. Zayas ñe’ẽpapára he’i Gómez Serrato rehe ha’e mbo’eharapavẽ ohekombo’éva mbo’eharakuérape, ha’e oĩ yvateve ñandehegui.

Emiliano R. Fernández he’i hese: Gómez Serrato ha’eha mbyja overavéva mbyjaita apytépe guarani ñe’ẽme, ha Pa’i Guash ombojoja chupe Horacio rehe.

Hembiapokuéra apytépe oĩ “Cancionero Paraguayo”, ipype oĩ ñe’ẽpotykuéra ojehecharamóva’ekue Revista Okára Potykuemípe ojeromandu’ávo Mariscal Solano López arareñói. Hembiapo poravopyre guaraníme héra “Jasy Jatere”. “Visión de la Patria”, “Estampas Paraguayas” ojehaíva castellano-pe. Darío Gómez Serrato ojapo avei tembiapo pukoe rupive ohekombo’ehápe ñe’ẽtekuaa guarani.

Omoheñói Asociación de Escritores Guaraníes, oĩva Autores Paraguayos Asociados ryepýpe, oĩ avei Academia de la Lengua Guaraníme ha oñeme’ẽ jopói chupe Ministerio de Defensa Nacional 1960-pe.

Ha’e ombohova pyahu ñe’ẽpoty guarani ojesarekóvo ndaha’éi he’íva añóre, avei ijysajáre ha hi’ári ombojuky ha ombohe’ẽ ñane ñe’ẽ guarani.

Ohai avei ñe’ẽhaipyrépe ğuarã mombe’upy guarani, heta jey oñembojopóiva, péicha oĩ “Porandu’imi”.

Ñe’ẽhaipyre oñemoirũ Facundo Recalde, Emiliano R. Fernández, Julio Correa ha Félix Fernández ndive.

Ñoha’angápe omba’apo Gervacio Recalde Céspedes ha Francisco Rivarola ndive. Ohai tekoha ha avápe, tetã rembiasa ha ñorãirõkuéra, tekove reñói ha jerovia, ko’ãva rehe oñe’ẽva oĩ ã tembiapo: “Guavira Poty”, “Ñesũháme”, “Residenta-kue”, “Kurusu ára”, “Pyhare Poty”, “Aravera Pyhare”, “Ñasaindy jave” ojekuaavéva jasy morotĩme ha hetave

Omano 13 jasypakõi 1985-pe.

 

Ohai Prof. Dra. Matilde Galeano de Aguiar.