Biografía de Narciso R. Colman (Rosicrán)

NARCISO RAMÓN COLMÁN. (ROSICRÁN)

Heñói Yvytymi, 29 jasypa 1876-me. Itúva Juan Vicente Colmán ha isy Rosa Isabel Cuéllar. Ary 1906-me omenda Victoria Mersán rehe ha heñói María Victoria.Ary 1937-pe omenda jey Venancia González Contreras rehe, ha upépe heñói irundy ta’ýra: Narciso de los Reyes, Florencio de los Santos, Juan Bernabé Y Teófilo Ramón Colmán. Oñemoarandu “Escuela Normal de la Capital”, upéi oiko ichugui telegrafista. Upe rire oike ichugui Estación de Ferrocarril del Paraguay, Yvytymími myakãhára. Ary 1897-pe oho Buenos Aires-pe ha upépe avaei omba’apo Estación del Ferrocaril Argentino, Palermo-pe. Ojevy ñane retãme ary 1901-pe ha oiko ichugui Juez de Paz, San Bernardino-pe, ha Juez de Paz en lo civil y comercial, San Roque-pe.Ary 1950, 20 jasyteĩ ha itavateépe ohecharamo ichupe haihára, ñe’ẽpapára ha ñoha’angahára ha opavavete myakãhára ñe’ẽhaipyre rehegua oñembyatypa upépe ha ome’ẽ ichupe “Ofrendas Laureas Gloria Nacional”. Oñe’ẽ upéramo Juan Boggino, Fernanado Rivarola, Roque Centurión Miranda, Félix Fernández, Carlos Jara, Pedro Encina Ramos ha Darío Gómez Serrato ohendukáva ichupe peteĩ ñe’ẽpoty pukoe rupive Peña Hermosa guive.Omba’apo jepéva’ekue heta academias ha instituciones cultura rehegua, umíva apytépe Asociación de poetas, escritores ha artistas guaraníes, upépe oñeme’ẽ chupe Manuel Ortíz Guerrero ha Emiliano R. Fernández ndive kuatia he’ihápe ha’eha “Gloria Nacional”.Ary 1922-pe Congreso Internacional de Americanistas oñembyatýva Río de Janeiro-pe ogueruka chupe medalla de bronce hembiapo hérava “Ñande ypykuéra” rehe.Ary 1931-pe oho méxico-pe “Séptimo Congreso Americano”; 1928-pe oñeipepirũ oho hağua París-pe “Instituto Internacional de Cooperación Intelectual de París, Congreso de Artes Populares”-pe. Ary 1953-pe oñeme’ẽ ichupe “Condecoración Nacional del Mérito, en el grado de Caballero”, gobierno nacional.Roberto Romero ojeporeka Narciso R. Colmán rehe, oikuaauka hağua moõite pevépa oğuahẽ ko karai arandu, ndaha’éi “okára poty”, “Petỹ roky”, “Ha che Valle” umi ojeikuaavéva apytépe añónte upe ohaíva.                                                                                                     Ita’yrakuéra rupi ko’áğa jaikuaa ha’e ohaihague avei ñoha’angápe ğuarã, péicha peteĩ naiñapysẽiva’ekue héra “Kamba nambi”, ha’éva peteĩ ñoha’anga omombe’úva ava okaraygua jehasa’asy, colonia-ramoguare ha ojehaíva guaraníme.“Kamba nambi” ndaje ohechauka ipype jepokuaa, okaraygua tekopotĩ, Francia-ramoguare.  Ko ñoha’anga araka’eve ndojekuaaukái.

 

Ohai Prof. Dra. Matilde Galeano de Aguiar.