Biografía de Felix Fernández

FÉLIX FERNANDEZ.

Heñóiva’ekue Itauguápe, 18 jasypokõi 1897-me. Itúva José Dolores Fernandez ojekuaáva Lolo arpero-ramo ha isy Petrona Galeano de Fernadez, itávape oñemoarandu ñepyrũ’ypykuri, oguerekóramo 10 ary ohai “Cerro Cora”, purahéi iñe’emondóva ojepurahéi hağua opaite tenda rupi, péicha he’i decreto 1944-pegua, oikórõguare ñorãirõ Bolikuéra ndive katuete ñane retã pysyrõhára opurahéiva’erã.

Paraguaýpe oike Banda de Policia-pe ha oñemoarandu, upéi oiko ichugui mbo’ehára Teoría ha Solfeo ha Instrumento rehegua. Jaguaron-pe ohekombo’e pumbasy, purahéi ha ñe’ẽpoty Mbo’ehao Nacional Moises Bertoni-pe. Oisambyhy Bandas Itaugua, Luque ha Paraguarípe, avei oike Banda de Musica de Bomberos de Policia-pe.

Oguerekórõguare 35 ary oho avei upe ñorãirõ Bolikuéra ndive, regimiento 13 Tujuti-pe, upérõ ohaímava’ekue heta ñe’ẽpoty, umíva apytépe “Reservista Purahéi” ojeruréva Mariscal Estigarribia ichupe omomorãvo kuña paraguái. Ñorãirõ aja, Mariscal ome’ẽ chupe jopói itajúgui ha ohai upemarõ “Tupãsy Ka’akupe”.

Ary 1948-pe oguerekóma heta hembiapokue ha léi rupi oñeme’ẽ ichupe 200 guaranies ary jasykõi 1948 guive, oĩ tendotárõ Higinio Morínigo.

Oje’e avei ha’e omoheñóihague ñoha’anga Guaraníme Francisco Martin Barrios ndive

oisambyhy iñoha’anga aty hérava Kunu’ũ Syry, oĩ upe atýpe Roque Centurión Miranda, Francisco Rivarola, Ladislaa Acosta, Darío Gómez Serrato, Manuel Rivas Ortellado ha’eva avei decorador, ko aty ndive ohechauka mokõi jey hembiapo hérava “Mborayhu paha” Teatro Nacional-pe.

Dr.Eligio Ayala, tendota upérõ ohenói ichupe ha ohecharamógui ikatupyryha he’i estado

ome’ẽtaha ichupe pirapire, ijaty ndive oho hağua ñane retãpy rupi ohechaukávo ñoha’anga paraguái Guaraníme, péva ha’e ndohecharamói ha ndohovéintema tendota rendápe.

Omano ary 1984-pe.

Ohai Prof. Dra. Matilde Galeano de Aguiar.