domingo, 11 de noviembre de 2012

Cuento en Guarani (TUICHAVÉVA KO MUNDO-PE)



TUICHAVÉVA KO MUNDO-PE.
Peteĩ ára karai ohóva’erã omba’apo ikokuépe, ho’ysãiterei, ipynandi ha helada ohapy asyeterei chupe. Upévare ipochyeterei ha he’i:
-  Mba’eichaguáiko nde  helada, che pykytĩ asyetéva.
- Ndachéi - he’i chupe heláda.  Kuarahy ningo upe  ivalevéva ha’e che mboykúgui
- Kuarahy omboyku hielo, hielo che pykytĩ asyetéva - he’i karai  ha oho kuarahy rendápe oporandu chupe:
- Eremína chéve, nde kuarahy, mba’éicha  rupípa ndevaleterei ajeve remboyku  hielo-pe.
- Nda chéi - he’i chupe kuarahy.  Araí ningo pe ivalevéva ha’e chemo’ãgui.
- Arai omo’ã  kuarahy, kuarahy omboyku  hielo, hielo che pykytĩ asyetéva - he’i karai,  ha oho arai rendápe oñe’ẽ chupe:
- Ere chéve, nde arai, mba’éichaiko nde ndevaleterei  remo’ã kuarahýpe.
- Nda chéi - he’i  chupe arai. Yvytúko pe ivalevéva, ha’e che mosarambígui.
- Yvytu omosarambi arai, arai omo’ã  kuarahy,  kuarahy omboyku h ielo, hielo cha pykytĩ asyetéva- he’i karai ha oho yvytu rendápe he’i chupe:
- Ere chéve,  nde yvytu,  mba’éicha rupípa ndevaleterei remosarambi araípe.
- Nda chéi - he’i chupe yvytu. Tápia ningo pe ivalevéva che jokógui.
- Tápia ojoko yvytu, yvytu omosarambi arai, arai omo’ã  kuarahy, kuarahy omboyku hielo, hielo che pykytĩ asyetéva - he’i karai ha oho tápia rendápe.
- Eremi chéve,  nde tápia, mba’éicha rupípa nde ndevaleterei  rejoko yvytúpe.
- Ndachéi - he’i tápia. Angujáko pe ivalevéva chembokuágui.
- Anguja ombokua tápia, tápia ojoko yvytu,  yvytu omosarambi arai, arai omo’ã  kuarahy, kuarahy omboyku   hielo, hielo che pykytĩ asyetéva - he’i karai, ha oho anguja rendápe he’i chupe:
- Eréna chéve, nde Anguja, mba’éichapa nde ndevaleterei  embokua tápia.
- Nda chéi - he’i chupe Anguja, Mbarakaja  ivalevéva ha’e chejukágui.
- Mbarakaja ho’u Anguja, Anguja ombokua tápia, tápia ojoko yvytu,  yvytu omosarambi arai, arai omo’ã kuarahy, kuarahy omboyku  hielo, hielo che pykytĩ asyetéva  he’i karai, ha oho mbarakaja rendápe he’i chupe:
- Ere chéve Mbarakaja, mba’éichapa nde ndevaleterei rejuka angujápe.
- Ndachéi -  he’i chupe Mbarakaja. Jaguáko pe ivalevéva chesu’úgui.
- Jagua oisu’u Mbarakaja, Mbarakaja ho’u Anguja, Anguja ombokua tápia, tápia ojoko yvytu, yvytu omosarambi arai, arai omo’ã kuarahy, kuarahy omboyku hielo, hielo che pypkytĩ asyetéva - he’i karai, ha oho Jagua rendápe he’i chupe:
- Ere chéve, nde Jagua, mba’éicha rupi nde ndevaleterei reisu’u Mbarakajápe.
- Ndachéi - he’i Jagua. Garrote la ivalevéva che mbuepotígui.
- Garrote oinupã Jagua, Jagua oisu’u Mbarakaja, Mbarakaja ho’u Anguja, Anguja ombokua tápia, tápia ojoko yvytu, yvytu
omosarambi arai, arai omo’ã kuarahy, kuarahy omboyku hielo, hielo che pykytĩ asyetéva - he’i karai, ha oho garrote
rendápe ha he’i chupe:
- Ere chéve, nde garrote, mba’éichapa nde ndevaleterei rembuepoti jaguápe.
- Ndachéi - he’i garrote. Tatáko pe ivalevéva che rapýgui.
- Tata ohapy garrote, garrote oinupã  Jagua, Jagua oisu’u Mbarakaja, Mbarakaja ho’u Anguja, Anguja ombokua tápia, tápia
ojoko yvytu, yvytu omosarambi arai, arai omo’ã kuarahy, kuarahy omboyku  hielo, hielo che pykytĩ asyetéva - he’i karai,  ha oho tata rendápe he’i chupe:
- Eréna chéve, tata, mba’éichapa nde ndevaleterei rehapy garrótepe.
- Ndachéi - he’i chupe tata. Ýko pe ivaléva che mboguégui.
- Y ombogue tata, tata ohapy garrote, garrote oinupã Jagua, Jagua oisu’u Mbarakaja, Mbarakaja ho’u anguja, anguja
ombokua tápia, tápia ojoko yvytu, yvytu omosarambi arai, arai omo’ã kuarahy, kuarahy omboyku hielo, hielo che
pykytĩ asyetéva - he’i chupe:
- Eréna chéve, nde y, mba’éichapa nde ndevaleterei rembogue tatápe
- Ndachéingo - he’i chupe y, Guéi tujáko pe ivalevéva ha’e che y’upágui.
- Guéi tuja hoy’u  y, y ombogue tata, tata ohapy garrote, garrote oinupã Jagua, Jagua oisu’u Mbarakaja, Mbarakaja ho’u
Anguja, Anguja ombokua tápia, tápia ojoko yvytu, yvytu omosarambi arai, arai omo’ã kuarahy, kuarahy omboyku hielo, hielo che pykytĩ asyetéva - he’i karai, ha oho Guéi tuja rendápe oporandu chupe:
- Mba’éichapa, nde Guéi, ndevaleterei rey’upa  y.
- Che ndachevaléi - he’i chupe Guéi tuja.
- Kyse apĩ ningo upe ivalevéva,  o-degolla Guéi tuja, Guéi tuja hoy’u  y, y ombogue tata, tata ohapy garrote, garrote oinupã Jagua, Jagua oisu’u Mbarakaja, Mbarakaja ho’u Anguja, Anguja ombokua tápia, tápia ojoko yvytu, yvytu omosarambi arai, arai omo’ã kuarahy, kuarahy omboyku hielo, hielo che pykytĩ asyetéva- he’i karai, ha oho kyse apĩ  rendápe he’i chupe:
- Eréna chéve, kyse apĩ, mba’éichapa nde ndevaleiterei  re-degolla- Guéi tujápe.
- Che ndachevaléi. Herrero la ivalevéva ha’e che apógui he’i Kyse apĩ.
Herrero ojapo Kyse apĩ, Kyse apĩ, o-degolla Guéi tuja, Guéi tuja hoy’u  y , y ombogue tata, tata ohapy garrote, garrote oinupã Jagua, Jagua oisu’u Mbarakaja, Mbarakaja ho’u Anguja, Anguja ombokua tápia, tápia ojoko yvytu, yvytu omosarambi arai, arai omo’ã kuarahy, kuarahy omboyku hielo, hielo che pykytĩ asyetéva - he’i karai, ha oho herrero rendápe he’i chupe:
- Eremína chéve, Herrero, mba’éichapa nde ndevaleierei rejapo kyse apĩme.
- Ndachéi - he’i chupe herrero. Ñandejára ningo pe ivaléva ha’e ningo cheapo.
Domingo AdolfoAguilera

3 comentarios: