Compañía Teatral Roque Sanchez-Graciela Pastor

COMPAÑÍA ROQUE SÁNCHEZ-GRACIELA PASTOR

 Ary 1954-pe Roque Sánchez ha Graciela Pastor omohu’ã mbo’esyry Escuela Municipal de Arte Escénico y Declamación, oisambyhýva Roque Centurión Miranda. Upérõ oñepyrũma oipykúi tape ñoha’angápe ha oike ñoha’anga aty oĩháme Ernesto Báez, Emigdia Reisofer ha Sarita Antúnez, hendivekuéra ojapo zarzuela “Raída Potĩ”, “Hilario en Buenos Aires”, “Korochire”, “Cañón 105” ha “Que viene mi marido”.

Ary 1956-pe oike ñoha’angahára aty oĩháme Mercedes Jane ha Sara Giménez, hendivekuéra ojapo ñoha’anga hérava “Casilda”, “Un paraguayo en la luna” ha omoñepyrũ comedias infantiles, umíva apytépe “Pinocho”, “Cuentos infantiles”, “Pluf, el fantasmita”. Opakuévo upe ary oñembyaty compañía pyahu hérava Vargas-Sánchez-Rojas Doria, omyakãva mbohapy ñoha’angahára tuichavéva ha’éva: Alejo Vargas, Roque Sánchez ha Rafael Rojas Doria, hendivekuéra 1ª actríz: Graciela Pastor. Oñondive ojapo ñoha’anga “La máscara” ha “Manuel Ortíz Guerrero”.

Ary 1957-pe teatro Municipal “Ignacio A. Pane” ojehechauka ñoha’anga hérava “Tan chiquitita y quiere casarse” ohaíva’ekue Alberto Novión, Argentina-ygua ha upérõ heñói Compañía Teatral Roque Sánchez-Graciela Pastor.

Oñemopyendámarõ ova Argentina-pe, ary 1960 omba’apohápe hikuéi ñoha’angápe ha ipype ojehe’a Paraguái ha kurepi ñoha’angápe. Ary 1963 ojevy Paraguáipe ha oñepyrũ tembiapo teatro-pe ha pukoe rupi ojapo radioteatro, péva rupi ojekuaa ichupekuéra opaite tenda ñane retãpýre.

Redioteatro ojapóva Roque Sánchez ha Graciela Pastor heñóimava’ekue voi oike mboyve ñoha’angahára atýpe, upérõ omoirũ chupekuéra Ricardo Turia, España-ygua, Humberto del Mar ha Alba Monterrey, upérõ ojekuaa chupekuéra “La pareja estelar del radioteatro”-ramo.

Hembiapokuéra apytépe oĩ: “Drácula”, “El hombre del piloto negro”, “La novia del vampiro”, “Al cielo vestida de novia”, “El pericón del diablo”, “Una flor ultrajada”, “Luisón de pago largo”, “El negro que habló con Dios”, ã tembiap radioteatro omboyvate chupekuéra ha oñepyrũ oikundaha ñane retãpýre oĩhápe pista katuete oiko ñoha’anga ojapóva Roque Sánchez-Graciela Pastor ndive.

Sánchez Pastor rembiapo teatro ha radioteatro-pe omoherakuãrporã chupekuéra upéicha rupi heta ára oĩ hikuéi Elenco Teatral Estable Municipal, avei Roque Centurión Miranda atýpe, avei “Folklorista de la leyenda del Karáũ” atýpe, Rojas Doria ha Alejo Vargas atýpe, Oscar Barreto Aguayo, zarzuela apohára ndive, ha Miryan Celeste atýpe ha hetave. Ko’ãva atykuéra ndive ojapo ñoha’anga, umi ojekuaavéva apytépe oĩ: “El mal entendido”, “Desheredado”, “El novicio rebelde”, “La barca sin pescador”, “El sí de las niñas”, “La noticia”, “Boli”, “La tía okára”, “El solterón”, “La pesquisa”, “Bendita seas”, “Profesor Titanius”, “Mi suegra está loca”, “Ña Lolo super star”, “Pacholi”, “Arévalo”, ha’éva peteĩ teĩ umi hetakue apytépe ohechaukáva Roque Sánchez ha Graciela Pastor rembiapo ñoha’angakuéra apytépe.

Tembiapo iporãvéva ha ojapóva ha’ekuéra ha’e pe ñoha’anga jegueraha opaite tenda rupi oğuahẽ’ỹ meve mavavéva arte apohára rehegua, ndoikuaái kane’õ, araro’y, arahaku katuete oĩ tenda ojejapo hağũa ñoha’anga. Upekuévo Graciela Pastor oñembokatupyrýva locución radial-pe avei omba’apo ipype ha Roque Sánchez katu ohekombo’e ñoha’angápe Escuela Municipal de Arte Escénico-pe, avei mbo’ehaoha rupi ha Escuela Municipal de Teatro de San Lorenzo-pe omoñepyrũva’ekue 1992-me.

Ary 1995 Roque Sánchez-pe oñeme’ẽ oisambyhy hağua “Instituto Municipal de Arte de San Lorenzo”, upe arýpe Municipalidad ome’ẽ ichupe “Condecoración Honor al Mérito” ha avei “Medalla de Oro”, omaba’apohaguére ñoha’angápe ha ombokatupyryhaguére mitãrusukuérape ñoha’angahára apópe. Hérape ko’áğa mbo’ehao San Lorenzo-pe ogueraha héra “Maestro Roque Sánchez” ha avei peteĩ tape.

Heta omba’apo rire ñoha’angaháraramo. Ñoha’anga sambyhyhára ha ñoha’anga mbo’eháraramo, Roque Sánchez omano 17 jasykõi ary 1997-me. Ohómaramo jepe yvy ape árigui compañía teatral Roque Sánchez-Graciela Pastor oikove, omoheñoihaguére ipehẽnguekuéra akãme ñoha’anga rayhu.

Herateékuri Roque Victoriano Sánchez Mendoza ha heñói Paraguaýpe, 16 jasypoapy 1961-pe.

Ohai Matilde Galeano